ಅಜ಼ಾನ್ - a call for prayer



ದೂರದಲ್ಲೊಂದು 
ಆಳದ ಕೂಗು ಅರ್ಥ
ವಾಗದ ಭಾಷೆ
ಅರ್ಥ ತಿಳಿಯದ
ಹಾಡು.
ಬಿಳಿಯ ಗೋಪುರ
ದ ಸುತ್ತ ಪಾರಿವಾಳದ
ಗುಟುರು ಸುತ್ತುವ
ಜಗತ್ತಿಗೆ ಸತ್ಯ 
ದೆಡೆಯ ಕರೆಯು
ಚಾಚಿದ ತೋಳುಗಳ
ಸೇರುವ 
ದಾಹಾವು ಮರೆ
ತವರ ನೆನಪಿಸುವ
ಆ ಒಂದು 
ಉಸಿರು.

ಮುಳುಗುವ ಸೂರ್ಯ
ನೊಡನೆ ಮೊಳಗಿದ
ಆ ದನಿಯು
ಸತ್ತ ಕನಸುಗಳೊಳಗಿನ
ಸೂಪ್ತ ಕನವರಿಕೆಯು
ಭಾವನೆಗಳ ಕೆರಳಿಸುವ 
ನೋವ ನೆಚ್ಚರಿಸುವ
ಆವಿಯಾಗದ 
ಸುಖವ ಅರಸಲಾ 
ತರಿಸುವ 
ಆ ಸಣ್ಣ ಮೌನದಲಿ
ಸೂತಕದ ಭೀತಿಯು
ಎತ್ತರದ ದನಿಯ
ತಾರಕದ
ಆಲಾಪವು ಸಂಭ್ರಮ 
ದ ಗರ್ಭದಲಿ ತುಕ್ಕು 
ಹಿಡಿದಿರುವ
ನೋವು
ಪ್ರತೀ ಅಲಗಿನಲ್ಲೂ
ತೆರೆದು ಕೊಳ್ಳುವು
ದೇನೋ ನಿನ್ನೆಗಳ
ಮೇಲಿಂದ 
ತೇಲಿಬಂದಂತೆ ತಳ
ಮುಟ್ಟಿದ ರಾಡಿ
ಮೇಲೆದ್ದಂತೆ
ನಾಳೆಗಳ ನಂತರದ
ಬೆಳಕಿನಂತೆ

ಸುತ್ತಿಬಳಳಿದ ಸುಸ್ತು
ಹೆಪ್ಪುಗಟ್ಟಿದ 
ಅಳುವು ಪಲ್ಲವಿಸುವ 
ಪದಗಳ ಕೊನೆಯ
ಪ್ರತಿಧ್ವನಿಯು
ಮನವ ಕಲಕುವ
ಬಳುಕು; ಪ್ರಶಾಂತ
ಗಾಯನವು
ಕರುಣ ರಾಗದಲ್ಲೊಂದು
ದೈನ್ಯ ರೋಧನವು.
ಎಳೆದೆಳೆದು ಸಾಗುವ
ಸುಂದರ ಸಾಲು
ಗಳು ಕಿವಿ ಮುಟ್ಟಿದ 
ಶಬ್ಧ; ಕದ 
ತಟ್ಟಿದ ನೆನೆಸು
ಪ್ರಾರ್ಥಿಸುವ ಕೈಗಾಳಿಗಾ
ಪ್ರಾರ್ಥನೆಯ ತಿಳಿಸು!..



8/9/2011 


ಅವರಲ್ಲೊಬ್ಬ - ಅವ



ಚೈತ್ರದ ಹುಣ್ಣಿಮೆ.
ಹೊಳೆಬದಿಯ ಬಯಲು.
ಅಲ್ಲೇ ಎತ್ತರದಲ್ಲಿ 
ದೇವಸ್ಥಾನ.
ಆವತ್ತು ಜಾತ್ರೆ.
ಸೇರಿದ್ದ 
ಕೆಲವೇ ಮಂದಿ.
ಊರವರಷ್ಟೇ.
ಅವರಲ್ಲೊಬ್ಬ ಅವ.
ನಿರಹಂಕಾರಿ,
ನಿರ್ಭಾವುಕ.
ನಿರ್ವಿಕಾರ ಮುಖ.
ಅದರಲ್ಲಿ ನಗುವಿಲ್ಲ.
ದು:ಖದ ಲೇಪವೂ ಇಲ್ಲ.
ಒಂಥರಾ ತನ್ಮಯತೆ.
ನೀರಿನಿoದೆದ್ದು ಬಂದಂತೆ.
ಅತ್ತು, ತೋಯಿಸಿ 
ಖಾಲಿಯಾದಂತೆ.
ಶರಣಾಗಿ 
ತೋಡಿಕೊಂಡು
ಉಸಿರಾಡುವಂತೆ.
ಎಲ್ಲಾ ಕಳಕೊಂಡೂ
ಪಡೆದುಕೊಂಡಿದ್ದಂತೆ.
ಭಾರಹೊತ್ತು
ಭಾರ ಕಳಕೊಂಡಂತೆ.
ತೂಕದ ಹೆಜ್ಜೆಗೆ
ತೂಗುವ ತಲೆಯ ಮೇಲೆ
ದೇವರನ್ನು ಹೊತ್ತವ.
ಕೋಟಿ-ಕೋಟಿಯಲ್ಲೊಬ್ಬನವ
ಅವನ
ಅತ್ಯಂತ ಪ್ರೀತಿಯ
ಸೇವಕ- ಅವ.


28/5/2014 


ಅವಳು-ನೆನಪು


ಅವಳೆಲ್ಲಿ ಹೋದಳೋ.
ಮೊನ್ನೆಯೊಮ್ಮೆ 
ಕನಸಲ್ಲಿ ಬಂದಿದ್ದಳು.
ಸ್ವಲ್ಪ ಹಳೇ ಮುಖ ಹೊತ್ತು.
ಆ ಫೋಟೋದಲ್ಲಿರುವಂತೆ
ಒಂಥರಾ ನನ್ನಹಾಗೆ 
ಕಾಣಿಸಿದಳು.
ನಗುವಾಗ.
ಹೊರಗೆ ಕೂತಿದ್ದಳು
ಮೆಟ್ಟಿಲ ಮೇಲೆ.
ಯಾವತ್ತಿನ ಹಾಗೇ.
ನೆಟ್ಟಗೆ ಬೆನ್ನು
ಎಣ್ಣೆಯೊತ್ತಿ
ಬೈತಲೆ ಬಾಚಿದ ಕೂದಲು
ಅಗಲ ಮುಖ
ಅಚ್ಚ ಬಿಳಿ ಬಣ್ಣ
ಹತ್ತಿಯ ಹಗುರ ಸೀರೆ
ಒಂದು ಕಾಲದ 
ಸುಂದರಿ ಎಂದು 
ಯಾರೂ ಹೇಳಬಹುದು.
ಕಾಲ ಗೀಚಿದ್ದೊಂದಷ್ಟು 
ಗೆರೆ ಬಿಟ್ಟರೆ 
ಆ ದಿನಗಳ ವೈಭವದ
ಗುರುತು ಹಾಗೇ ಇತ್ತು.
ಅಜ್ಜಿ.
ಸತ್ತು ವರ್ಷವಾಯಿತು.
ಮೊನ್ನೆ ಅವಳ 
ಪೆಟ್ಟಿಗೆ ತೆರೆದಿದ್ದೆ.
ಪ್ರೀತಿಯಿಂದ ಎತ್ತಿಟ್ಟಿದ್ದ 
ಒಂದಷ್ಟು ಸೀರೆ,
ಒಂದು ಬಾಚಣಿಗೆ,
ಕುಂಕುಮದ ಡಬ್ಬಿ,
ಎರಡು ಇನ್‌ಲ್ಯಾಂಡ್ ಲೆಟರು
ನಾಲ್ಕು ಜಿರಳೆ ಗೋಲಿ
ಮತ್ತೊಂದು ಸಣ್ಣ 
ಪಕೀಟು.
ಅಜ್ಜ ಕೊಟ್ಟದ್ದಂತೆ.
ಅದರೊಳಗಿದ್ದ ಪುಟಾಣಿ 
ಕನ್ನಡಿ ಮತ್ತು 
ಇದು ರೂಪಾಯಿ ಪಾವಲಿ.
ಅವಳ ಸೀಮಿತ 
ಪ್ರಪಂಚದ ಹಾಗೆ.
ವಿಚಿತ್ರ ಅನ್ನಿಸಿತು.
ಅಲ್ಲೆಲ್ಲಾ ಹರಡಿದ್ದ
ಅವಳ ಪರಿಮಳ
ಆ ಮೆದು ಬೆರಳುಗಳ
ತಂಪು ಸ್ಪರ್ಶ
ಆರಿ ಹೋಗದಂತೆ  
ಕಾಪಿಡಲು ಮನಸ್ಸಾಗಿ
ಗಟ್ಟಿ ಮುಚ್ಚಿಟ್ಟೆ.
ಬಾಯ್ತುoಬ ಕರೆಯುವ 
ಮನಸ್ಸಾಗಿ
"ದೊಡ್ಡಮ್ಮಾ" ಅಂತ ಒಂದ್ಹತ್ತು
ಸಾರಿ ಕೂಗಿದೆ.
ದೂರದಿಂದ ಅವಳನ್ನು ಕೂಗುವ
ಹಾಗೆ.
ತುಳಸಿಕಟ್ಟೆಯಲ್ಲಿ ಕೂತಿದ್ದ ಕಾಗೆ 
ಕತ್ತು ಅಲುಗಿಸುತ್ತಿತ್ತು.
ಅವಳೆಲ್ಲಿ ಹೋದಳೋ..
ತನ್ನ 'ಪೇಟಿ'ಯೊಟ್ಟಿಗೆ 
ನಮ್ಮನೆಲ್ಲಾ ಬಿಟ್ಟು.


28/8/2014