ಹವಣಿಕೆ; ಅದರಾಚೆ

ಹುಚ್ಚಿ ಅವಳು.

ಕೆನ್ನೆಗೆ ಕೆಂಪು 

ಉಗುರಿಗೆ ರಂಗು 

ಕಣ್ಣಿಗೆ ಕಾಡಿಗೆ ತಿಕ್ಕುತ್ತಾಳೆ.

ಕಿವಿಗೆ ದೊಡ್ಡ ಝುಂಕಿ 

ಮುತ್ತಿನ ಸರ 

ಕೂದಲನ್ನುದ್ದಕ್ಕೆ ಹೆಣೆದು 

ಕೆಳಗೆ ಬಿಡುತ್ತಾಳೆ. 

ತಿಳಿ ಹಸಿರು ಅಂಗಿ 

ಹೆಗಲ ಮೇಲಿನ ಸೆರಗು 

ತುದಿ ಎರಡನ್ನೂ ಸೇರಿಸಿ

ಗಂಟು ಕಟ್ಟುತ್ತಾಳೆ.

ತುಟಿಗೆ ಗುಲಾಬಿ ಮೆತ್ತಿ 

ಕಾಲ್ಗೆಜ್ಜೆ ಹಾಕಿ  

ಜಗತ್ತಿನಲ್ಲೇ ಸುಂದರಿ 

ಎಂಬಂತೆ ಸಂಭ್ರಮಿಸುತ್ತಾಳೆ.

ನಾಚಿಕೊಳ್ಳುತ್ತಾಳೆ 

ಮೆಲ್ಲ ನಗುತ್ತಾಳೆ 

ಕನಸು ಕಾಣುತ್ತಾಳೆ

ಉಸಿರಾಡುತ್ತಾಳೆ.   

ಮೆಲ್ಲ ಓಡಿ ಬಂದು 

ಕನ್ನಡಿ ಮುಂದೆ ನಿಲ್ಲುತ್ತಾಳೆ.

ಅಸೂಯೆಯಿಂದ ನೋಡುತ್ತಾಳೆ  

ಆಸೆಯಿಂದ.

ತನ್ನಲ್ಲೇ ತಾನು ಮೋಹಗೊಂಡಂತೆ

ನಿಧಾನಕ್ಕೆ 

ಕಣ್ಣಲ್ಲಿ ಕಣ್ಣಿಟ್ಟು 

ಗಮನಿಸುತ್ತಾಳೆ

ರೆಪ್ಪೆ ಮಿಟುಕಿಸದೆ.

ಮುಖ ಬೆವರುತ್ತದೆ;

ಬಣ್ಣ ಬಿಡುತ್ತದೆ.

ಬೆಚ್ಚಿ ತಡಕಾಡಿ

ಕಣ್ಣ ಕೆಳಗಿನ ಕಪ್ಪನ್ನು

ತಿಕ್ಕಿ ಉಜ್ಜುತ್ತಾಳೆ.

ತುಟಿಯ ಗುಲಾಬಿಯನ್ನು

ಅಂಗೈಯಿಂದ ಒರೆಸುತ್ತಾಳೆ.

ತೊಟ್ಟ ಮಣಿಗಳನು

ಎಳೆದು ಹಾಕುತ್ತಾಳೆ

ಸಡಿಲಾದ ಗಲ್ಲವನ್ನು 

ಮುಷ್ಟಿಯಲ್ಲಿ ಹಿಡಿದು 

ಜೋರಾಗಿ ಅಳುತ್ತಾಳೆ.

ಬಾಯಿ ತೆರೆದು.

ಶಬ್ಧ ಬರುವಂತೆ.

ಕುತ್ತಿಗೆಯ ನರಗಳೆಲ್ಲಾ 

ಹೊರ ಬೀಳುವಂತೆ,

ಒಡಕು ತುಟಿ 

ಬರಡು ಚರ್ಮ 

ಕತ್ತಿನ ಕುಳಿ 

ಸಣಕಲು ದೇಹ

ಜೋಲಾಡುವ ಎದೆಯನ್ನು 

ಬೆರಳಿಂದ ಸವರುತ್ತಾ

ನೋವನ್ನೆಲ್ಲಾ ಅಗೆದು ತೆಗೆವಂತೆ

ಹೊಟ್ಟೆಯೊತ್ತಿ ಹೊಕ್ಕುಳಿನಿಂದ;

ವಿಕಾರ ಮುಖಮಾಡಿ 

ಬಿಕ್ಕುತ್ತಾಳೆ.

ಮತ್ತೆ ಅವಸರಿಸಿ

ಬೂಟಿನೊಳಗೆ ಹುದುಗಿದ್ದ 

ಒರಟು ಪಾದವನ್ನು 

ಒತ್ತಿ ಎಳೆಯುತ್ತಾಳೆ.

ಕನ್ನಡಿಯ ಮೇಲೆಸೆದು

ಹಳೇ ಹಂಬಳಿಯನ್ನು 

ಮುದುಡಿ ಅಪ್ಪುತ್ತಾಳೆ.  

28/3/2014